Mradi wa Maji Warejesha Tabasamu kwa Wanafunzi wa Jamhuri

 

Mbarali. Wanafunzi wa Shule ya Msingi Jamhuri iliyopo Kijiji cha Ilongo, Kata ya Ilongo wilayani Mbarali mkoani Mbeya, wameanza kunufaika na mradi wa maji safi uliotekelezwa na Rufiji Basin Water Board kupitia Mradi wa NBS-USANGU.

Kabla ya utekelezaji wa mradi huo, wanafunzi walilazimika kutembea zaidi ya kilometa tatu kutafuta maji, hali iliyokuwa ikiathiri mahudhurio yao, kuongeza uchovu na kuchelewesha masomo. Wengine walilazimika kufika shuleni wakiwa wamechoka, jambo lililopunguza umakini darasani.

Kupitia mradi huo, kisima kirefu kimechimbwa na maji kusambazwa moja kwa moja shuleni pamoja na kwa wananchi wa maeneo jirani, hatua iliyoboresh­a mazingira ya kujifunzia na kuimarisha usalama wa wanafunzi.

Akizungumza katika hafla ya uzinduzi hivi karibuni , Mwalimu Mkuu wa shule hiyo, Jenifer Sanga, alisema upatikanaji wa maji ndani ya shule ni mabadiliko makubwa kwa ustawi wa wanafunzi.

“Hii ni faraja kubwa kwetu. Sasa wanafunzi hawatapoteza muda kutafuta maji na wataweza kujikita zaidi katika masomo yao. Tunaamini hata ufaulu utaongezeka kwa sababu mazingira yameboreshwa,” alisema Sanga.

Mwenyekiti wa Kijiji cha Ilongo, Benjamini Mwakalonge, alisema mradi huo umekuwa suluhisho la changamoto ya muda mrefu ya maji katika eneo hilo.

“Tunashukuru kwa kuifikia jamii yetu. Maji haya yatasaidia si wanafunzi tu bali pia wananchi wanaozunguka shule hii. Sasa tunapata maji karibu na makazi,” alisema Mwakalonge.

Hata hivyo, ushirikiano kati ya Serikali ya Japan na Tanzania umeendelea kuimarika kupitia miradi ya maendeleo inayolenga kuboresha maisha ya wananchi, hususan katika maeneo ya vijijini yenye changamoto za miundombinu ya maji.

imelezwa kuwa uwekezaji katika sekta ya maji ni hatua muhimu katika kuboresha afya, elimu na ustawi wa jamii kwa ujumla, akisisitiza kuwa upatikanaji wa maji safi na salama ni msingi wa maendeleo endelevu.

Mradi huo umetkelezwa na Rufiji Basin Water Board kupitia Mradi wa Kuimarisha Mbinu za Asili za Kijamii za Usimamizi wa Vyanzo vya Maji na Kuhimili Mabadiliko ya Tabianchi (NBS-USANGU), unaofadhiliwa na Serikali ya Japan kupitia World Bank.

Kupitia mradi huo, wanafunzi wa Shule ya Msingi Jamhuri sasa wananufaika si tu kwa kupata maji karibu, bali pia kwa kuimarika kwa mazingira ya usafi shuleni, jambo linalotarajiwa kupunguza magonjwa yanayotokana na ukosefu wa maji safi.

Baadhi ya wanafunzi waliozungumza kwa furaha walisema awali walikuwa wakichelewa kufika shuleni au kushindwa kuhudhuria vipindi vya asubuhi kwa sababu ya jukumu la kutafuta maji, lakini sasa wana muda wa kutosha wa kujifunza na kushiriki kikamilifu katika shughuli za shule.

Uongozi wa shule umeeleza kuwa uwepo wa maji utasaidia pia kuanzisha bustani za shule na miradi midogo ya lishe, itakayochangia kuboresha afya za wanafunzi na kuongeza ari ya kujifunza.

Kwa ujumla, mradi huo umeonekana kuwa kichocheo cha mabadiliko chanya katika Kijiji cha Ilongo, ukionesha namna usimamizi endelevu wa rasilimali za maji unavyoweza kuleta matokeo ya moja kwa moja katika sekta ya elimu na maendeleo ya jamii kwa ujumla.