Ugonjwa wa Mapele Ngozi kwa Ng’ombe Kupatiwa Ufumbuzi

Daktari wa Mifugo Mfawidhi wa ZVC Iringa, Dkt. Jeremia Choga (L) wakati wa zoezi la uchukuaji sampuli. 

Na Friday Simbaya, Iringa

 

Ugonjwa wa Mapele Ngozi (Lumpy Skin Disease - LSD) umeendelea kuwa miongoni mwa magonjwa hatari yanayoathiri mifugo, hususan ng’ombe, na kusababisha hasara kubwa kwa wafugaji kutokana na gharama za matibabu na vifo vya wanyama.

 

Hivi karibuni, ugonjwa huo umeripotiwa kushambulia maeneo ya Nyanda za Juu Kusini, hasa katika Halmashauri ya Wilaya ya Momba mkoani Songwe, hali iliyosababisha taharuki kwa wafugaji. Takwimu zinaonesha kuwa takribani ng’ombe 750 wameathirika na baadhi kufa katika kipindi cha Februari hadi Machi, 2026 wilayani humo.

 

Kufuatia mlipuko huo, Serikali kupitia wataalamu kutoka Kituo cha Huduma za Mifugo Nyanda za Juu Kusini (ZVC Iringa) na Taasisi ya Chanjo za Mifugo Tanzania (TVI), wameweka kambi wilayani Momba kwa ajili ya kufuatilia hali ya ugonjwa huo na kuchukua sampuli kutoka kwa wanyama walioathirika.

 

Lengo la zoezi hilo ni kufanya uchunguzi wa kisayansi maabara utakaosaidia kubaini chanzo cha ugonjwa na hatimaye kuzalisha chanjo ya kudhibiti na kuzuia maambukizi yake.

Akizungumza wakati wa zoezi la uchukuaji sampuli, Daktari wa Mifugo Mfawidhi wa ZVC Iringa, Dkt. Jeremia Choga, alisema serikali inaendelea kuwajali wafugaji kwa kuhakikisha wanapata huduma bora za mifugo ili kuongeza tija katika ufugaji.

 

“Serikali inatambua umuhimu wa sekta ya mifugo katika uchumi wa nchi. Ndiyo maana imekuwa ikichukua hatua mbalimbali, ikiwemo ujenzi wa majosho, utoaji wa dawa za kuogeshea mifugo pamoja na chanjo ya ugonjwa wa homa ya mapafu ya ng’ombe (CBPP) kwa gharama nafuu,” alisema Dkt. Choga.

 

Aliongeza kuwa serikali imejipanga kuhakikisha ugonjwa huo unadhibitiwa na hatimaye kupatiwa ufumbuzi wa kudumu.

 Kwa upande wake, mtafiti kutoka Taasisi ya Chanjo za Mifugo Tanzania (TVI), Dkt. Fredy Makoga, alisema jukumu kuu la taasisi hiyo ni kufanya tafiti na kuzalisha chanjo mbalimbali za mifugo ili kuboresha sekta ya ufugaji nchini.

 

“Tunawahakikishia wafugaji kuwa tunaendelea na juhudi za kutafuta suluhu ya ugonjwa huu, kama tunavyofanya kwa magonjwa mengine ya mifugo kama homa ya mapafu ya ng’ombe (CBPP), chambavu (Black Quarter) na kimeta (Anthrax),” alisema.

 

Katika kipindi hiki cha mlipuko wa ugonjwa huo, wafugaji wamehimizwa kuzingatia usafi wa mifugo yao, hususan kuogesha mara kwa mara ili kudhibiti kuenea kwa ugonjwa katika maeneo mengine.